Est istada inaugurada su 15 de custu mese s'Universidade Filipina de Roma chi tenet s'obietivu de promòvere sa cultura e mantènnere su sentimentu de apartenèntzia a s'identidade culturale de orìgine, duncas non petzi sa limba, ma finas sa cultura, s'istòria, s'arte e sa mùsica de sa comunidade filipina chi est in sa tzitade. "Totu in s'òtica de non colonizare a nemos e de dare oportunidades noas a sos filipinos, belle semper impignados comente domèsticos o assistentes familiares" - narat Franceso Florenzano presidente de s'Upter.

Sa comunidade filippina est presente in Itàlia dae pagu prus o mancu trinta annos.

Como in Itàlia sunt pagu prus o mancu 95.000 sos filipinos cun permissu de permanèntzia, ma prus de 100.000 non tenent unu permissu regulare. In Roma sunt pagu prus o mancu 25.000 e sunt pagu prus o mancu 30.000 sos filipinos nàschidos in Itàlia, in s'ora chi in Roma in chimbe annos nde sunt nàschidos pagu prus o mancu 1.000. "Su prus de custos pitzinnos ant a abarrare in Itàlia, non faeddant sa limba issoro e s'iscola e sas istitutziones no agiudant sa trasmissione de sa limba materna. Custu est un'isbàlliu ca su bilinguismu est importante pro trasmìtere su sentimentu de apartenèntzia a sa cultura de orìgine", narat Francesco Florenzano.[lmr]