[16-07-2006]

Chircadores de s'Universidade de Sidney ant bidu chi sas pessones prus mannas de edade sun prus pagu nevròticas de sos giòvanos. Un'istìdiu fatu gràtzias a sa risonàntzia magnètica  fatu subra de pessones de edade incruida intre 12 e 79 annos narat chi s'istabilidade emotiva megiorat cantu prus colant sos annos a cunfrontu de su chi  si pessaiat pro su decadimentu de sas funtziones tzelebrales.

Sa proa de su benistare emotivu at mustradu chi sos indivìduos prus emotivos sunt cussos intre sos 12 e sos 19 annos, imbetzes sos prus fritos sunt cussos intre sos 50 e sos 79 annos. Sos volontàrios fiant 242 pessones chi fiant pròpiu sanas de salude.

Sa risonàntzia magnètica e sa misura de s'atividade elètrica sunt serbidas pro monitorare sas rispostas de su cherbeddu cando fiant inditadas espressiones de sa cara de timòria o de cuntentesa.

Sos giòvanos sunt istados prus pagu pretzisos pro identificare sas espressiones de cuntentesa e ant controlladu peus sas emotziones negativas.

A pustis de sos 70 annos su benistare emotivu megiorat meda e comente si siat si andat a innantis cun s'edade e si reagit megius a sas emotziones negativas. In pràtica su cherbeddu càmbiat e si addatat semper de prus pro nche colare s'emotividade. Cun sos annos su cherbeddu seletzionat  sas rispostas a sos istìmulos, afortende s'abilesa de reatzione. Sa chirca non faghet àteru chi afortire s'opinione populare chi sos annos e sos sacrifìtzios de sa bida batint sabiesa. [apg]

[>www.lafolla.it]