[15-07-2006]

S'impreu pro tempus meda de meighinas a base de cortisone, sos trapiantos de òrganos, su fatu de abarrare firmos immòbiles pro tempus meda (in casu de ictus o de lesiones ispinales) sunt sas càusas de s'osteoporosi segundària.

L'ant sutaliniadu sos espertos riunidos in Firenze in su primu simpòsiu internatzionale "Càusas segundàrias de s'osteoporosi  chi non si connoschent ma chi sunt importantes".

"Sas càusas segundàrias de s'osteoporosi  sunt comunas meda ma a s'ispissu non si connoschent e galu prus pagu sunt diagnosticadas"  narant sas "Chairpersons" de su Simpòsiu, sa professora Maria Luisa Brandi de s'Universidade de Firenze, e su professore Sol Epstein, de Mt Sinai Medical School de New York.

Segundu sos espertos, sunt prus dìligas sas pessones chi pigant meighinas ormonales antitumorales, chie at fatu interventos cun by pass pro situatziones de obesidade e totu sas pessones chi giughent bassa sa vitamina D comente chie tenet problemas a sos renes e a su fìgadu.  [apg]

> [Agi]