[24-09-2006]

Est allarme incuinamentu puru in sas tzitades de s'arcu alpinu: in sos ùrtimos annos sos valores de ozonu e prùeres fines (Pm10) sunt crèschidos e sighint a crèschere. Est su chi est essidu a pìgiu in Aosta a sa presentada de sa chirca Transalp Air, fata totu paris dae sas agentzias ambientales de Val d'Aosta, de sos cantones isvìtzeros de Vaud, Valais e Ginevra e de su Dipartimentu frantzesu de Ain, Savoie e Haute Savoie tràmite 50 istatziones de rilevamentu. "Custu traballu de chirca, at cummentadu s'assessore a s'ambiente de sa Val d'Aosta Alberto Cerise, sutalìniat s'importàntzia de una collaboratzione internatzionale in chistiones de incuinamentu chi non las podent afrontare petzi sas colletividades locales solas." In su 2005 in Ginevra su livellu de ozonu nch'at coladu de 10 bias su liminàrgiu de informatzione, est a nàrrere su lìmite chi coladu est perigulosou pro sa salude umana, Aosta imbetzes at fatu registrare sos prus livellos artos de prùeres fines colende·nche 56 bias sos lìmites pro die, in fatu b'est Losanna cun 19 bias. Signales positivos arribant imbetzes dae sas rilevatziones de su biòssidu de azotu, chi in s'ùrtima dècada at minimadu mescamente in sas tzitades, pro more de sa difusione de su catalizadore. [gmr]

[>lanuovaecologia]