[10-09-2006]

Sa British Petrolium ammitet de àere fatu errores in su tempus coladu in matèria de seguràntzia e tutela ambientale, ma ispricat finas chi cheret promòvere unu comitadu indipendente pro valutare sas mègius medidas de adotare a pustis de sas pèrdidas iscobertas in sos oleododos de Prudhoe Bay, in Alaska, chi in austu in printzìpiu ant causadu sa suspensione cumpleta de sa produtzione de petròliu e a pustis su torrare a cumintzu de s'atividade, mancari a regìmene bassu. L'at naradu su nùmeru unu de sa Bp America, John Malone, durante sa prima die de auditziones in su Cungressu promòvidas dae su sutacomitadu Energia e Cummèrtziu pro investigare sas càusas chi ant cajonadu su blocu de su prus giatzimentu de grègiu mannu de su Nordamèrica, cun unu potentziale de 400.000 bariles sa die, s'8% de totu sa produtzione interna de sos I. U. A.. Malone at agiuntu puru chi sa cumpangia britànnica est aumentende sos gastos pro su megioru de sa manutentzione de rafinerias e oleodotos, in prus de revisionare sas pràticas de tràficu de s'oro nieddu. Su colossu energèticu, su de tres in su mundu pro capitalizatzione de Borsa, bivet in sos I. U. A. una pèrdida de credibilidade sena pretzedentes, ca devet finas afrontare unu protzessu pro s'esplosione in sa rafineria de Texas City, chi at fatu 15 mortos e sas acusas de àere manipuladu sos prejos de petròliu e derivados, in prus de sos de su gas. [gmr]

[>lanuovaecologia ]