|
|
In Sardigna semper prus caentu
Temperadura aumentada de unu gradu in 30 annos
[23-07-2006]
Su Sar (Servìtziu Agrometerelògicu Regionale pro sa Sardigna) at naradu chi in sos ùrtimos trinta annos sa temperadura mèdia in s'ìsula est aumentada de unu gradu tzentìgradu. Una misura prus manna cunforme a su chi càpitat a livellu planetàriu (prus 0,4-0,8 grados) ma non b'at de s'ispantare bidu sas dimensiones e sas caraterìsticas de sa Sardigna e su fatu chi custu aumentu de temperadura pertocat totu su Mediterràneu. Sa maladia de sa lingua blu chi corfet sas berbeghes est istada batida dae unu babautzu arribadu pro more de s'aumentu de sa temperadura. A pàrrere de unos cantos istudiosos diat pòdere torrare finas sa malària e in su 2050, cun una crèschida de àteros 2 o 3 grados at èssere in arriscu su 30% de sas ispètzies animales. In su Mediterràneu oramai si bident pisches tropicales (pische balestra, iscualeddos minores, upeneus molucensis, pische botza, su pische paone, pische serra, pische papagallu) e prantas de su Sud Àfrica. Sa cosa paradossale est chi s'aumentu de sa temperadura terrestre e iscagiamentu de s'astra de s'Àrticu diant èssere su primu passu cara a una glatziatzione noa. [fpn]
|
|
|
