Editore: Newton e Compton Editori
Data de pubblicatzione: Maju 2006
Pàginas: 250
Preju: 9,90 èuros

Sas normas internatzionales chi règulant s'impreu de sa fortza militare oe sunt analizadas in manera atenta meda, mescamente a pustis de sa destitutzione de Slobodan Milos`evic´ e de Saddam Hussein mediante gherras no autorizadas dae sas Natziones Unidas. Su libru de Michael Byers tratat bator àreas temàticas: - s'autorizatzione de su Cussìgiu de seguràntzia de s'Onu; - s'autodefensa contra a su terrorismu e sa gherra preventiva; - s'atzione umanitària e sa defensa de sa democratzia; - sa protetzione de sos tziviles e de sos cumbatentes durante su cunflitu armadu.
Sos temas sunt tratados analizende uno cantos avenimentos in èpocas diferentes: dae s'intzidente de su Caroline in su 1837, a sas torturas subra de sos presoneris in sa presone irachena de Abu Ghraib fatas dae sordados americanos. Atentzione manna est dada a sas protestas nàschidas a pustis de s'interventu in Kosovo in su 1999, in Afghanistàn in su 2001 e in Iràq in su 2003.
Byers analizat s'isvilupu de su deretu umanitàriu internatzionale dae sa batalla de Solferino in su 1859 finas a oe, mescamente pro su chi pertocat sa protetzione de sos presoneris e su còmpitu de sos tribunales de gherra e de sa Corte penale internatzionale. Su volume, in prus, tratat finas de sa funtzione de sos Istados Unidos pro s'isvilupu e aplicatzione de sas règulas de custa parte de su deretu internatzionale. [sch]