Seletzione Pùblica pro Tìtulos e Esàmenes pro sammissione a su Master de Tradutzione e Comunicatzione in Limba Sarda Promòvidu dae su Cunsòrtziu Universitàriu de sa Sardigna Tzentrale, Nùgoro in collaboratzione cun sa Universidade Autònoma de Bartzellona

Pro sa formatzione de 30 pessones espertas in tradutzione e comunicatzione in limba sarda .

Su Cursu at a èssere fatu in Nùgoro, pro 320 oras, dae freàrgiu a làmpadas de su 2007 .
Sas pessones ammìntidas in su Cursu non pagant nudda pro frecuentare sas letziones. Si devet petzi pagare una tassa de iscritzione de 272 èuros e, a sa fine de su Cursu, unu cuntributu de 175 èuros pro sa cunsinna de su Tìtulu.
Sa frecuèntzia est obrigatòria.

Pro leare parte in su Master, sos candidados devent èssere laureados in cale si siat facultade, e decrarare, in sa dimanda, de connòschere sa limba sarda orale e iscrita e a su nessi una limba istràngia, chi una siat inglesu, ispannolu, frantzesu, catalanu, tedescu, e de tènnere pràtica bastante in su manìgiu de sos elaboradores eletrònicos, de programas de tratamentu de testos e de navigatzione Internèt.

Pro èssere ammìntidos, sos Candidados devent colare una prova iscrita e orale e presentare tìtulos eventuales e curriculum vitae.

Sa dimanda pro leare parte in su Master bolet fata in su mòdulu chi si podet riterare in sa segreteria de su Master, Cunsòrtziu Universitàriu de Salaris 18, Nùgoro, tel. 0784-244704/244704, o si podet iscarrigare dae su situ: www.consuninuorese.it Intro de mesudie de su 30 ghennàrgiu 2007, sa dimanda bolet cunsinnada a manos (no imbiada cun sa Posta) a: Cunsòrtziu Universitàriu, Salaris 18, Nùgoro.