Dae carchi chida, in prus de 30 biddas de sa Provìntzia de Nùgoro, sunt presentes, in onzi intrada e essida, unos 180 cartellos cun su nùmene in sardu: Bortigale, Brevì, Bìroro, Dèsulu, Durgali, Duarche, Fonne, Garteddi, Lòcula, Lùvula, Macumere, Mamujada, Ulìana, Ortzai, Onanie, Oniai, Onieri, Orane, Oroteddi, Osidde, Pasada, Silanos, Thiniscole, Otzana, Sa Calita, Santa Luchia, Santu Juanne de mare.

Est su resurtadu de unu prozetu finantziadu dae sa Leze 26/97 de sa RAS e amaniadu dae s'Ufìtziu de sa Limba Sarda de sa Provìntzia de Nùgoro diretu dae Diegu Corraine, pro torrare su nùmene in sardu a sas biddas nostra. Sa Leze 26 ma finas sa leze 482/99 de s'Istadu previdet sa possibilidade de torrare a su topònimu (nùmene de su logu) in sardu.

De sas 50 comunas de sa Provìntzia, petzi in una bindighina de biddas su nùmene in sardu fiat zustu, e currispondiat a sa pronùntzia ufitziale: Orosei, Gavoi, etc. In sas àteras, su nùmene non currispondiat a sa pronùntzia bera e locale. Pro custu su prozetu "Sa bidda mea in sardu" a collidu a pare in unu annu de chirca e de istùdiu su nùmene comente est pronuntziadu in su logu, comente resurtaiat in sos documentos istòricos, e comente s'Aministratzione comunale disizaiat chi esseret resurtadu in su cartellu. Petzi a pustis chi onzi Comuna at istabilidu su nùmene zustu e sa manera de l'iscrier, cun una delìbera apòsita pro onzi Comuna, sunt istados fatos sos cartellos e postos in onzi intrada e essida.

"Sa bidda mea in sardu" est unu prozetu pilota, su primu, pro torrare sa limba sarda a s'ufitzialidade. Cun resurtados positivos, si est beru chi in onzi bidda, sa zente at apretziadu meda s'idea de dare ufitzialidade a sa limba sarda.