In sos meses de santugaine e santandria de ocannu in Casteddu ant a istrangiare su "Babel Film festival", cuncursu nàschidu cun s'obietivu de abalorare e promòvere su tzìnema de sas minorias linguìsticas. S'eventu est istruturadu in sas setziones "Contu tzinematogràficu" e "Documentàriu " e naschet dae un'idea de Paolu Carboni, Tore Cubeddu e Antoneddu Zanda, cun sa collaboratzione, in mesu de sos àteros, de sa Comuna de Casteddu, de  sa   "Societa' Umanitaria-Cineteca Sarda", de sa "Federazione Italiana Circoli del cinema", de sa Provìntzia de Casteddu e de Cinecitta'. "Si tratat de un'initziativa nàschida in su coro  de su Mediterràneu", narat Tore Cubeddu, "e duncas est aberta a totu sos registas chi in sas òperas issoro  impreant o ant impreadu su corsicanu , su bascu, su catalanu, su sardu e àteras limbas minoritàrias". Su primu prèmiu est de 3.000 euro, a su cale s'acostàgiant su reconnoschimentu de1500 euros cunferidu dae su giuria formada dae sos sòtzios de sos tzìrculos de su tzìnema e 2000 euros riservados a su regista chi s'at a agiuigare  su prèmiu "Citta' di Cagliari". Sa partetzipatzione  a su cuncursu est gratis e sas òperas cherent imbiadas  intro de su 31 de triulas a sa segreteria de su "Babel Film Festival", anco sa Societa' Umanitaria-Cineteca Sarda in viale Trieste 118 in Casteddu.