Tradutzione in 'limba' de sas delìberas de sa Comuna, cursu de preparatzione  pro so dipendentes comunales. Sunt petzi duas de sas tares afidadas a s'isportellu de sa limba sarda chi at abertu in Sant'Antiogu. Sa sede de su servìtziu est  in su tzentru  culturale "i Sufeti" in ue òperat s'assòtziu culturale 'Sa bertula antiga'. S'isportellu garantit consulèntzia, tradutzione, promovimentu e tutela  de sa  limba  sarda minoritària cun sa persèntzia fitiana de un'intèrprete tradutore.

De fatu, si tratat de unu servìtziu capassu de  s'estèndere a  totu sos setores  de sa bida pùblica de sa comunidade,  in manera de garantire un'inserimentu ufitziale de sa limba sarda in s'amministratzione pùblica. Intro de pagu tempus, s'isportellu at a èssere integradu  cun su servìtziu  de situ internèt chi previdet s'implementatzione de cussu istitutzionale chi b'est giai, cun sa creatzione de unu ligàmene in intro suo in ue b'apat  delìberas, atos, modulìstica e avisos a sa populatzione, totu in limba sarda.